Coventry University Kazakhstan Астанада аумағы шамамен 30 мың шаршы метр болатын
жаңа заманауи кампус салу туралы меморандумға қол қойды

Primus Education тобының құрамына кіретін Coventry University Kazakhstan Астана қаласының әкімдігімен және Қазақстан Республикасының Ғылым және жоғары білім министрлігімен меморандумға қол қойды. Құжат елордада университеттің жаңа кампусын ашуды көздейді. Меморандумға Шымкент қаласында өткен KGIR-2026 инвестициялық дөңгелек үстелі аясында Қазақстан Республикасының Премьер-министрі Олжас Бектеновтің қатысуымен қол қойылды.

Меморандум форум аясында қол қойылған 22 құжаттың бірі болды. KGIR-2026 форумына 40-тан астам елден 500-ден астам инвестор мен бизнес өкілі қатысты.

«Біз үшін бұл — білім беру, ғылым және инновациялардың заманауи экожүйесін қалыптастыруға бағытталған стратегиялық маңызы зор жоба. Біздің ұзақмерзімді стратегиямыз Астана мен Алматы қалаларында жоғары білікті мамандар даярлайтын, ғылыми зерттеулер жүргізетін және индустриямен ынтымақтастық орнататын орталықтарға айналатын екі ірі университет кампусын құруды көздейді.

Primus Capital және Coventry University қолдауымен біз осы стратегияны жүйелі түрде жүзеге асырып келеміз. 2024 жылы Астанада Coventry University Kazakhstan университетінің алғашқы кампусы ашылды, ал 2026 жылы Алматыда кампус ашып, қызмет ауқымымызды кеңейттік. Келесі кезең жасанды интеллектке, озық инженерияға және технологиялар трансферіне ерекше назар аудара отырып, заманауи университеттік инфрақұрылымды дамытуды көздейді. Біздің мақсатымыз — сапалы британдық білім беріп қана қоймай, Қазақстан экономикасының дамуына ықпал ететін жаңа білім мен технологияларды қалыптастыру», — деді Coventry University Kazakhstan президенті Мирас Дәуленов.

Кампустың құрылысы кезең-кезеңімен жүзеге асырылады. Оның жалпы аумағы шамамен 30 мың шаршы метрді құрайды. Кампус аумағында оқу корпустары, әкімшілік үй-жайлар, қоғамдық кеңістіктер, кітапхана, IT-инфрақұрылым, сондай-ақ студенттік іс-шаралар мен бірлескен жобаларды өткізуге арналған орындар орналасады.

Сонымен қатар 400 орындық студенттік жатақхана салу жоспарланған. Онда тұрғын бөлмелер, асүйлер, демалыс және оқу аймақтары қарастырылады.

Университет Ұлыбританиядағы Coventry University-дің толыққанды кампусы болып табылады және осы университеттің білім беру бағдарламаларын жүзеге асырып, түлектеріне британдық диплом береді.

Қазақстан Республикасының Ғылым және жоғары білім министрлігі университетке бейінді мемлекеттік органдармен байланыс орнатуға қолдау көрсетуге дайын. Тараптар сапалы жоғары білімді дарынды жастарға, соның ішінде оқу үлгерімі жоғары түлектер мен олимпиада жеңімпаздарына қолжетімді етуді көздейді.